ویب ڈیسک
نجی ٹی وی کے سینئر کیمرہ مین عمران یامین پر نمائش چورنگی کے قریب جلسے کی کوریج کے دوران تشدد اور لوٹ مار
یہ صرف ایک فرد پر حملہ نہیں بلکہ آزاد صحافت پر براہِ راست حملہ ہے۔
مشتعل افراد کے روپ میں موجود عناصر نے عمران یامین کو تشدد کا نشانہ بنایا، ان کا پرس، اے ٹی ایم کارڈ، این آئی سی اور نقدی چھین کر فرار ہو گئے۔ یہ واقعہ واضح کرتا ہے کہ جلسوں کے نام پر صحافیوں کو دانستہ غیر محفوظ بنایا جا رہا ہے۔
ہم اس بزدلانہ اور قابلِ نفرت اقدام کی سخت ترین الفاظ میں مذمت کرتے ہیں۔ صحافی کسی جماعت کے کارکن نہیں ہوتے، وہ عوام تک سچ پہنچانے کی ذمہ داری نبھاتے ہیں۔ کیمرہ توڑنا، شناختی دستاویزات چھیننا اور تشدد کرنا جمہوری اقدار پر حملہ ہے۔
پاکستان تحریک انصاف کراچی کے عہدیداروں سے واضح مطالبہ ہے کہ وہ فوری طور پر چینل فائیو نیوز کے لاکھوں روپے کے نقصان کا ازالہ کریں اور ذمہ دار عناصر کے خلاف عملی کارروائی کریں۔ صحافی بغیر کسی معاوضے کے اپنی جان خطرے میں ڈال کر کوریج کرتا ہے، اس کے باوجود شرپسندی ناقابلِ قبول ہے۔
بصورتِ دیگر، پوری صحافی برادری پاکستان تحریک انصاف کی سرگرمیوں کے مکمل بائیکاٹ پر مجبور ہوگی اور ہونے والے نقصان کی ذمہ داری براہِ راست پاکستان تحریک انصاف کراچی ڈویژن کی قیادت پر عائد کرتے ہوئے قانونی کارروائی کی جائے گی۔
صحافیوں پر تشدد ناقابلِ قبول ہے۔ خاموشی جرم کے برابر ہے۔